انهاردة يومنا مفتوح بس كل واحد يحب يقول حاجة يا ريت تكون مهمة ومفيدة يعنى متكنش حاجة مش هتفيدنا بشئ زى حد يقول انا كلت فاصوليا مع انى مبحبهاش فأمتلأ المكان بالضحك فرفع وليد محمد يده مستأذنا بالحديث ووقف ليتكلم
وليد : انا كنت حابب اطرح موضوع الجامعة والفرق بينها وبين ثانوى مين كان متوقع يشوف ايه وملقاش ده؟
فأجاب طه حسين : انا لما دخلت الجامعة كنت فاكر انى هلاقى الدنيا لعب وخروج بس اتصدمت بالعكس انها كانت جد ومحاضرات بعكس ماكنت متوقع
واضاف وليد : بالرغم من صعوبة المرحلتين ثانوى وجامعة الا انى احب انصحكم انكم تستمتعوا فى الفترة دى على قدر الإمكان علشان بعد كدة مش هتعوضو الأيام دى تانى
فعقب د محمود : فترة الجامعة مهمة اوى فى حياتنا وهى بتشكل جزء كبير من اهتماماتنا بعد كدة فى الحياة حاولو تروحو اماكن جديدة وممتعة زى المسارح والحفلات والندوات الادبية لأننا فى فترة الجامعة بيكون عندنا حرية اكتر نقدر نخرج عكس المدرسة
الهام عبد الغنى : انا كان نفسى ادخل الجامعة بس الظروف مسمحتش واتجوزت صغيرة وبعدين كان ليا اصدقاء فى مرحلة الجامعة كنت باخد كشاكيلهم وابيضلهم المحاضرات وكنت بتخيل انى فى المحاضرة وبحضر المحاضرات دى وكأنى عايشة جو الجامعة
فرد عليها ماجد مشجعا : انت ممكن تكملى وتدخلى تعليم مفتوح الفرصة لسة موجودة
وأثنى د.محمود : فعلا ده موضوع شيق يا وليد … يا ترى فى حد حابب يطرح فكرة جديدة نتناقش فيها
فوقفت رقية طارحة فكرة جديدة : يا ترى ايه مدى تأثير السينما على الناس؟
فردت مريم : مش شرط انها تأثر لأن لما بتفرج على فلم حد بيقتل حد اكيد مش هقلده
رد وليد : السينما بتأثر فى الناس اللى شخصيتها ضعيفة اللى ممكن يشوفو حد بيعمل حاجة ممكن تكون مش كويسة بس الفلم نجح وكسر الدنيا فيبدأوا يقلدوا البطل فى كل سلوكياته بدون تفكير
فأعترض ا.احمد : السينما ملهاش علاقة بإسلوبنا لأ سلوكياتنا بتتكون نتيجة البيئة اللى اتربينا فيها والمدرسة وعوامل تانية زى الجينات الوراثية
رقية : كل الاراء عن السينما سلبية محدش شايف ان ليها تأثير ايجابى ؟
رد سامح قائلا : لما بنشوف فيلم بيكون ليه تأثير ايجابى وسلبى فاحنا اللى بنختار لما بنسمح لأى نوع فيهم انه يأثر فينا
د.محمود : اكيد ليها تأثير ايجابى وبالنسبة ان السينما زمان كانت جميلة بالنسبالنا ودلوقتى سيئة فاكيد جدى قال لولاده برضو زمان محدش يروح السينما وحذرهم منها ….. حد حابب يضيف موضوع جديد
فوقف طه معلقا : انا كنت عاوز اتكلم عن اسباب الانفلات الاخلاقى وانتشارها دلوقتى بكثرة؟
فأجابه سامح قائلا : ان الاسرة هى احد اهم العوامل فى تكوين الاخلاق لحد الوقت اللى بنكبر فيه ونبقى مستقلين بذاتنا ونتعلم من المجتمع الاسرة الكبيرة
واكمل وليد : فى مثل بيقول يخلق من ظهر العالم فاسد ومن ظهر الفاسد عالم فإذا احنا اهتمينا بالأطفال من صغرهم واننا نزرع جواهم فى اول 5 سنين الاخلاق الحميدة احنا كدة هنعمل مجتمع عنده اخلاق
وأضاف ا.احمد : ان مينفعش اصحى من النوم اقرر انى هيكون عندى اخلاق او العكس واخرج اعامل الناس على حسب اللى بختاره
فأكد على كلامه د.محمود قائلا : ان فعلا الاخلاق مرتبطة بعلاقتنا بالمجتمع مينفعش واحد عايش لوحدو فى الصحرا واقول عنده اخلاق او لا و الاخلاق ملهاش علاقة بالمظاهر زى اللبس ومظاهر التدين ،الأخلاق لازم تكون نابعة من داخل الانسان من خلال معاملته مع الناس , يعنى كلنا بننتقد المجتمعات الغربية لما بيسكرو مع ان المجتمع التعاملات بين الناس جيدة فأنا مليش دعوة اذا كان واحد بيروح بيته ويسكر هو حر فى نفسه طالما مش بيإذى الناس.
واستطرد د.محمود ناهيا الندوة: اعتقد ان انهاردة احنا اتناقشنا واتكلمنا فى مواضيع كتيرة ومختلفة وكلنا شاركنا واتمنى ده يتكرر دايما .
