سأل د.محمود :
يا ترى إيه بيخطر ببالنا عند ذكر النيل؟
قال شهاب متحمسا : إحنا عندنا في الأقصر منطقه اسمها الممشى وفيها زرع وممنوع فيها المواصلات للمشي فقط وسط الزرع.
مصطفى تركي : الناس بيرمو الحيوانات الميتة في آلميه أنا مرة شفت حمار ميت وواحد بيستحمى في النيل
د/ محمود : هو ليه بيستحمى في النيل
مصطفى : أكيد معندوش ميه ولا نور
د/ محمود : إيه ممكن يعجبك تانى
مصطفى : ساعات بقعد أصطاد في المرسى بتاعة الجزيرة
فسال د.محمود منبهرا : بتصطاد أد إيه ؟
مصطفى : ممكن اتنين كيلو
د/ محمود : وأنتى يا أمينه أخبار النيل معاكى إيه؟
أمينه : النيل بيفكرنى بالهدوء وصفاء النفس وساعات بقعد في مشتل وبشوف الناس في الأسواق بتبدأ تتجمع على الساعه 7 الصبح على النيل لغسل الخضرة ولما بنصطاد النيل فيه استاكوزا وبلطى
د/ محمود لما نبص على النيل نعرف ونفهم انه في حاجات وحشه بس ياريت نركز أكتر على الحاجات الحلوة تفتكروا إيه ممكن يكون بيلوث النيل
إلهام : المصانع اللى موجوده في حلوان وطرة الأسمنت بترمى مخلفاتها كلها في النيل.
د/ محمود : ده اسمه التلوث الكيميائى وده أخطر أنواع التلوث اللى ممكن يلوث النيل.
واستطرد د.محمود : ها يا محمود انت بقى علاقتك بالنيل إيه ؟
محمود وليد : أنا كان نفسي أصور صورة للنيل وصديقى قالى في مرسى ممكن تصور فيها ولما رحت شفت واحد قاعد بيذاكر على النيل وكان شكله حلو أوى المهم النيل كان حلو لدرجه إنى سبت التصوير وقعدت على النيل زيه.
د/ محمود : ابقى ابعت الصور وشاركها مع الجميع يا محمود علشان نشوف شغلك… الفن يا ولاد هو رؤية, حاجه الناس كلها بيمروا عليها زى حالة أو موقف لكن صعوبة فن التصوير هو إلتقاط للحظة قبل مرورها .
الحياة فيها إبداعات وحاجات جميلة وطبيعة ساحرة النيل الغروب والشروق
أ/ أحمد : الأنسان لما بيتولد بيكون عنده برنامجين برنامج فسيولوجى طبيعى وبرنامج تعليمى من الأسرة والمجتمع إذا كان البرنامج التانى ضعيف مش هتلاقى انسان مبدع مستمتع بالجماليات والطبيعة فيكون أقرب للحيوان.
د/ محمود : وده واجب على المجتمع المثالى انه يوفر للانسان ممكن يمر وهو صغيربتجربه فيه بسيطه زى حفله أو شىء في المدرسه ممكن تسحبه لحياة حلوة وانه اخد باله من الحاجات الجميلة زى النيل ويسبها تأثر فيه وتخرج الحلو جواه.
سؤال طرح للدكتور
وإيه علاقة حضرتك يا دكتور بالنيل.
كل المصريين بيحبو النيل .النيل هو معنى كأنوا أبونا العجوز اللى خصب أرضنا وزرع جوانا الطباع والاسلوب وتصوراتهم للحياة بتدفقه وبخيرة واحساسهم انه رزق وسند موجود وممتد
فصدقت مقولة (مصر هبة النيل )
وفي حديقة الزهرية وحديقة الأندلس كنت بحب اقضي اوقاتى فيهم أثناء دراستي بسبب قربهم من النيل .وقريبا قمت برحله سياحية في النيل على مركب سياحي لمدة ليله كانت زى السحر كأنه مكان معزول بالرغم إن النيل قريب مش محتاج سفر
………………………………………………

أمينه غنت ( أهاجر وأسيبك لمين)

اعداد: نعمات خالد