أدار الندوة د.محمود
سائلا : يا ترى إيه الخبر الرئيسي إلى كل واحد يتمنى يصحى الصبح يقرأه في أول صفحة في الجرائد؟
قال ماجد : تطبيق العدالة الاجتماعية
سأله د.محمود : ليه بالذات يا ماجد العدالة الاجتماعية ؟
رد.ماجد : لإن لما المواطن يحس بالعدالة وان الخير بيعم على الجميع وثروات البلد بتتوزع بالعدل هيقل الفقر والجرائم وكل انسان هيحس بقيمته
د.محمود : ايه تانى نحب نقراه اول خبر في الجريدة
قالت نعمات : اتفاق جميع فئات الشعب على رئيس واحد
عقب د.محمود : يا ترى دى حاجة كويسة إن كل الناس تتفق على نفس الشخص ؟
نعمات :لأ طبعا كدة مش هيبقى في معارضة من مهمتها تعمل توازن وتحاسب الرئيس لما يغلط لكن لما بنوصل للنقيض لدرجة إن المختلفين في الرأى يقتلوا بعض دى بتكون ساعتها أمنية ملحة
د.محمود : هاه مين تانى عنده خبر نفسه يقراه في الجريدة الصبح ؟
اجابت إلهام : مصر تطلق أول صاروخ للفضاء .
د.محمود : جميل إن يبقى في أخبار مختلفة وتقدمية كدة
هاه يا ترى إيه اللأخبار الجديدة إللى ممكن نحلم بيها
أ.احمد : إختراع شريحة إلكترونية تؤثر على السلوكيات الشخصية للفرد .
قال ماجد مازحا : زى فيلم اللمبى 8 جيجا
أ.أحمد : اه ممكن تكون حاجة زى كدة…وأكمل سائلا د.محمود : وايه يا دكتور الخبر اللى بتتمنى تقراه ؟
د.محمود : إيجاد طريقة بسيطة واقتصادية لتحويل المياه المالحة إلى عذبة …أعتقد إن ده هيحل المشكلات المتوقع حدوثها في المستقبل والصراعات على المياه هتكون موجودة بوفرة لدرجة إن صعب قوى تتحكم فيها او تحتكرها
عقب أ.أحمد : الموارد إللى موجودة على كوكب الأرض تكفى 10مليار نسمة ومع ذلك بيموت أعداد كبيرة من الفقر والمجاعة وده معناه إن المشكلة في نفوس البشر المشكلة في بلاد ليها سلطة أقوى على بلاد اضعف واقل سيادة وهنا دكتور محمود بيقول إن المياه تبقى موجودة بوفرة لدرجة إن يبقى صعب احتكارها …
وعندما اشرف وقت الندوة على الانتهاء غنت أمينة لأم كلثوم
