,,,,,,
تناولنا الحديث عن المتحف المصري وعن أقسامه والأهتمام بالآثار به حتى أصغر قطعة به وغرفة المومياوات كما جعله ستارا لتهريب آثارنا الغالية من المخازن , موجهين ضفة الحديث إلى الحرية من خلال وجهة نظر كل عضو واختلافها باختلاف المجتمعات .
إلهام :”كنا متفقين هنتكلم في موضوعين (المتحف المصري) أولا ؟
محمود : “أنا رحت المتحف وأعرف إن الآثار اللي فيه متجمعة من أماكن كتيرة من الهرم ومومياوات.”
أمينة :”دخلت غرفة المومياوات وفي آثار فيه هناك وكانوا مرممين الآثار.”
مصطفى :”أنا رحت كتير في تمثال صغير بيلف حولين نفسه وبيلف لفة كاملة على مدار شهر, وفي تابوت اسود كان جثته جثة ساحر وشافوا كلمات عليه من كتاب الموتى وأكتر حاجة شدتني ان الأثار مش ناس بس ساعات بتبقى أدوات ونباتات انقرضت.”
نعمات :”الجزء اللي بنشوفه في المتحف ده جزء قليل أوي في المخازن في آثار كتير جدا ومعظم الوقت بسبب الفساد وقلة الإهتمام من المسؤليين كان اللي بيبقى مسئول عن الآثار بيبددها زي زاهي حواس برغم إدعائه حبه للحضارة الفرعونية لمصر إلا إنه أخد من الآثار دي وكان بيهادي بيها ناس مهمة من دول أخرى.”
إلهام :”عجبتني الملابس بتاعتهم وجرة الدهب وحاجات صغيرة بس كاتبين عنها تفاصيل كتير.”
إسلام :”قبل المتحف المصري كان كل المتاحف في العالم بتبقى قصور وبتتحول لمتاحف لكن المتحف المصري هو الوحيد اللي اتصمم على إنه متحف قبل بناءه.”
أحمد صبري :”هو مكان في مجموعة من التماثيل بتبين تطور الحضارة الفرعونية وهي كانت حضارة شاملة لكل المجالات فن وفلك , علوم وهندسة , دين والحضارة الفرعونية تعتبر مهد لكل الحضارات اللي جت بعد كدة.”
إلهام :”هنتكلم عن الحرية وكل واحد أكيد عنده كم عن الحرية عايز يقوله.”
إيريني :”الحرية إني أعمل كل إللي أنا عاوزاه بس فيه حدود أنا إللي بحطها.”
محمود :”كلنا في مصر محدش يعرف حاجة عن الحرية عشان إحنا معندناش حرية.”
أمينة :”الحرية بابا رباني عليها بس لازم أحط حدود وأمشي عليها.”
مصطفى :”الحرية كذا نوع في حاجة اسمها حرية شخصية وحرية عامة يعني في بلدنا الحرية العامة انك لما مثلا بنت تروح شاطئ عام مينفعش تلبس مايوه لازم تلبس عشرين حاجة.”
زياد :”الحرية ان الواحد يعمل كل اللي هو عايزه بس محدش يمنعه.”
نعمات :”الحرية نوعين شخصية وعامة الشخصية هي كل الاختيارات الفردية والافعال اللي الشخص بيعملها لنفسه وهو حر يعمل أي حاجة لكن الحرية العامة هي كل تصرف ممكن يعمله الإنسان يكون ليه علاقة بشخص آخر او أكتر وهنا حدود الحرية بتقف عند حدود الآخرين.”
دنيا :”الحرية إني أعمل اللي أنا عاوزاه حتى لو عايزة أتأخرزي الولاد بالليل أتأخرمثلا.”
كريم :”الحرية أحلى حاجة في الدنيا بس الدول العربية قمعية جدا غير الدول الأوروبية بتسيب الناس براحتها , في بلجيكا عملوا مظاهرات ومات فيها ناس فأستقال الوزير وتحمل المسئولية.”
محمد :”الحرية بدون أخلاق ودين كدة مفيش حرية وأن اللي الناس بتعمله حسب الإعلام وحسب المتاح حوالينا لكن محدش فاهم الصح الرسول تعب طول عمره عشان يوفرلنا حاجات لو عملناها هنعيش حياة كريمة أبسط شئ الإبتسامة لكن شوفو الناس عاملة إزاي في الشارع.”
اسلام :”أنا عندي تعليقات على كل كل الكلام وكان كلام الناس إن كل واحد المفروض يعمل اللي هو عايزه , لكن الص والغلط والضوابط دي حاجات نسبية بتتغير من مجتمع لمجتمع ودينا ادانا حرية عقلية إننا نسأل لو مش عارفين حاجة ونتناقش والرسول خير دائما لكن مينفعش إني أكون حر وخلاص من غير أي ضوابط كدة هيحصل فوضى.”
‫#‏قعدة_وصحبة‬
‫#‏مكتبة_خطوة‬