في قعدة وصحبة بدأ وليد الندوة متحدثا عن ابراهيم الفقي وعن الدبلومات التي حصل عليها ومشوار حياته وطموحاته وأحلامه التي استطاع تنفيذها وكيف نستفيد منه في حياتنا …كما تطرق عن كيفية مواجهة العقبات التتي تعيق تحقيق الحلم وكيفية التغلب عليها شارحا فكرة النوتة التي تنظم حياة الأنسان ولا يمكن الأستغناء عنها لمن يقدسون أهمية الوقت.
وليد :”هنتكلم عن ابراهيم الفقي هو كان عنده أحلام كتير لكن معندوش امكانية تحقيقها ماديا بس قدر يحقق كل أحلامه هو كان نفسه يبقى مدير أكبر فندق في العالم وحقق ده فعلا …يا ترى إيه أحلامنا اللي بنحلم نعملها زي الراجل ده ”
د.محمود :”أنا نفسي يبقى عندي مدرسة داخلية وده طبقا لطبيعتي وشخصيتي .”
الهام :”انا نفسي افتح حضانة واعلم الأطفال السلوكيات الكويسة والاتيكيت.”
نعمات :”أنا نفسي افتح مكتب هندسي بس محتاجة أشتغل في مكاتب الأول وادرب كتير عشان يبقى عندي خبرة كافية و اقدر أحقق حلمي.”
رقية :”أنا بحلم دايما إني أفضل متفوقة في دراستي زي ما أنا كدة.”
أمينة :”كل اللي فبالي اني أكون كويسة في حياتي وارتاح نفسيا.”
مصطفى :”انا نفسي اتجوز والف الدنيا انا وزوجتي.”
كريم :”انا عايز ابقى رئيس نقابة عمالية واجيب للعمال حقوقهم.”
ايمان :”عايزة أفتح مستشفى لعلاج الأطفال.”
رانيا :” في ناس لما تتعب مبتلافيش مستشفيات هنا مناسبة وبيبقى لازمو يسافرو يتعالجو برا ليه ميبقاش عندنا المستشفيات دي هنا.”
خالد :”نفسي ابقى مدرب تنية بشرية.”
طه :”ابراهيم الفقي عمل كتاب اسمه الاعذار والمفروض اننا منحطش اي عذر عشان كدة بنوقف نفسنا.”
وليد:”احنا نقدر نتحكم في حياتنا بالافكار اللي بنقنع عقلنا بيها.”
د.محمود :”انا مبسوط من طريقة تفكير وليد وطه ومش مبسوط بالناس اللي معندهاش خطط وسواء كان الإنسان صغير او كبير لو معندوش حلم هيعيش حياة كلها يأس الانسان لازم يوجه نفسه عن طريق الحياة والناس اللي بيعرفهم ولازم يختارهم قريبين من حلمه وداعمين ليه وفي الاخر صاحب الحلم هو اكتر واحد مستفيد من الحلم حتى لو كان مستشفى هتنفع الناس.”
طه :”لو اتولدنا مبنشوفش ولا بنتحرك هنعمل ايه …. اكيد كلنا بنقول ولا حاجة كان في واحد اسمه زكي محمود ده ولا كان بيشوف ولا بيتحرك بس عن طريق السمع اتعلم اللغة الانجليزية وحفظ القرأن كله.”
وليد :”انا هسألك سؤال أسأله لنفسك.”هو انا اتخلقت ليه ؟ وانت جاوب عالسؤال ده بنفسك وقولي طلع ايه…..ودلوقتي هنتكلم عن استراتيجية تحقيق الأحلام….وهنتكلم عن العقبات اللي ممكن توقف حايتنا وازاى اننا بنحب نسمع للأفكار السلبية ونقتنع بيعا أكتر.”
كريم :”أنا عندي أحلام بس في شخص قريب مني دايما بيقولي حاجات سلبية عشان يهدلي احلامي.”
رقية :”انا كان عندي صديقة كانت بتغير مني عشان احنا الاتنين متفوقين بس انا قدرت اكسبها وهي دلوقتي بتحبني اوي.”
وليد :”محدش مالوش أعداء حتى سيدنا آدم قبل ما يتخلق كان عدوه موجود المهم لو انت عايش ملكش اعداء ومحدش بيتكلم عنك وحش اعرف ان انت ملكش لازمة.”
خالد :”لما تعمل حاجة كويسة متستناش حد يكافأك وكافئ نفسك.”
طه :”في حد فتح محل بين شركتيم مشهورين اوي وهو مالوش اسم قام سمى المحل بتاعه الباب الرئيسي بقى الناس تدخل عنده هو.”
د.محمود :”احنا صنفنا الناس حوالينا انهم اعداء واحباب بس الناس بطبيعتها البشرية بتتغير طول الوقت يعني محدش بيبقى صديق علطول ولا حد بيبقى حبيب علطول كل واحد ليه طريقة في التعامل فيها اللي يعجبنا وفيها الللي ميعجبناش.”
رؤية :”الإنسان هو أكبر عدو لنفسه.”
وليد :” انا عملت نوتة لنفسي وحددت فيها اولوياتي وبدأت اطبقها من غير ما أخلي حاجة توقفني حتى لو واحد صاحبي محتاجني بقوله لأ لو خالف الجول بتاعي.”
د.محمود :”انت استعرضت استعراض حلو اوي لفكرة النوتة.”
مجدي :”انا عايز اقول ان ممكن نحتلف في طريقة التنظيم لكن مش في الهدف الكلي من ورا النوتة.”
وليد سأل عن رأي الناس في فكرة النوتة وأظهر الجميع اعجابهم بيها.”
د.محمود :”واضح من رأي الناس انهم مش معارضين ليه مش كلنا نطبق فكرة النوتة دي ونجيبها معانا المرة الجاية ونشارك خبرتنا معاها مع بعض.”
وقالت مريم ان في ابليكشن على سمارت فونز وده بيقوم بمهمة النوتة بالظبط لو حد مبيحبش يمسك ورق في ايديه.”
‫#‏قعدة_وصحبة‬
‫#‏مكتبة_خطوة‬