في ندوة قعدة وصحبة بدأ الحديث عن مصطفى محمود ورحلته من الشك الى الايمان وعلى الرغم انه كان طبيب الا انه كان دائما يشغل فكره بالأسئلة الفلسفية , باحثا عن الإجابات بالتحليل العلمي والنفسي … كما اندرج موضوع الندوة عن صفات القائد والتي اختلف على صفاته الكثير من الاعضاء ومما لا شك فيه ان من اهم صفات القائد فهم طبيعة الشخصيات المختلفة والتعامل معها والحصول على كاريزما جذب الناس له .
بدأ الندوة وليد سائلا تعرفوا ايه عن مصطفى محمود
أحمد : فاكر عنه برنامج العلم والإيمان .
وليد : هو وصل لدرجة من التفكير والعم إنه ألحد بسبب كثرة الشكوك.. ورجعله بعد كدة اليقين من تاني …كان دايما بيسأل أسئلة زي .. كل حاجة ليها بداية ونهاية .. طب ربنا بدأ منين كلنا مخلوقين طب مين خلق ربنا قبل ما يخلقنا … وهكذا
مصطفى : هي كل الفكرة انه زي الطبخة ليها طباخ لكن مينفعش الطبخة تصنع الطباخ .
نعمات : قريت في طفولة مصطفى محمود نقلا عنه حكى ان وهو طفل كان بيروح المسجد مع صحابه يحفظوا قرآن فكان معتقد ان الشيخ ده يعرف كل حاجة في الدنيا فسأله مرة ان في حشرات في البيت ومش عارفين يتخلصوا منها فقال له الشيخ اقرا هذه الآيات في البيت وهما هيمشوا فعمل كدة فعلا لكن الحشرات فضلت موجودة , فاخذ صحابه ووقفوا على باب الجامع وهو الشيخ خارج حدفوه بالطوب وقالوا انه بيقول كلام كدب … وديه كانت بداية بذور الشك عند مصطفى محمود .
وليد : هو كان في طبيعة شخصيته التمرد من صغره …. دلوقتي هنتكلم عن صفات القائد ..مين شايف نفسه ينفع يكون قائد .
فرفع معظم المتواجدين ايديهم .
وليد : طب ايه اهم صفة بتميز القائد .
فارس : العدل .. انه يعدل بين كل الناس .
أحمد : القائد بيدي زيادة بيعمل الحاجة بحب .
مصطفى : لازم يكون عنده ميزتين حب الجماعة وخوفهم منه .
وليد : هو مش شرط اخاف منك بس ممكن أخاف ازعلك .
وليد مكملا : هي صفات القائد دي موجودة جواه بالفطرة طب ينفع يبقى قائد معندوش موهبة القيادة .
رقية : عالاقل 1% موهبة والباقي مكتسب .
وليد : بالظبط هو انت ممكن متبقاش قائد بالفطرة اوي .. بس تعرف تتعامل مع كل الناس ومع كل الشخصيات السيئة ويكون شاطر في لغة الجسد لانها بتوصل الكلام بنسبة 70 % ويكون عنده القدرة على كسر الخجل والكلام امام جمهور… ولازم يكون رقيب على نفسه عارف فين نقاط ضعفه ونقاط قوته
رقية : انا بكلم نفسي وبسألها وبشتمها .
أحمد : لسة وانا جاى عملت حاجة غبية في الطريق كنت بشتم نفسي قبل ما ادخل المكتبة .
كريم : انا بحاسب نفسي لما بزعل حد .
وليد : اللي بيعاقب نفسه بشدة بيخسرها واللي بيريح نفسه ويعملها اللي هي عاوزاه هتبوظ وتفلت منه ….ومن صفات القائد برضو انه يعرف جمهوره ويشد الناس ليه عن طريق المناقشة معاهم فيشدهم ولو العدد كبير يسألهم ويشجعهم .
مصطفى : لازم تكون واثق في نفسك عشان لو انت مش واثق في نفسك مش هتعرف توصل المعلومة .
وانتهت الندوة بغناء احمد وفارس وكريم
والندوة القادمة عن د.مجدي يعقوب وكيفية التعامل مع الأخرين وستديرها زينب رفعت
‫#‏مكتبة_خطوة‬