و زى عادتنا قررنا نعمل حفلة جميلة نفرح قلوب أطفال مكتبتنا واتطوع معانا عدد كبير من الشباب اللى بيحبوا الخير
بدأنا حفلتنا بالتعرف على كل أطفالنا و أصحابنا
وعلمنا مسابقات وقلنا فوازير علشان الكل يتجمع

وبعد كدة بدأنا نلون الجرافيتى الخاص بمكتبتنا ( عيش سنك عيش حلمك ) وكان بمساعدة متطوعنا المحبوب جعفر

بعدها عملنا مسرحية العرائس وكانت ناجحة ومحبوبة جدا وخصوصا انها بطولة بوجى وطمطم وعم شكشك
بعد المسرحية عملنا فقرة الغنا ع الجيتار مع جعفر وغنينا مع أصحابنا واللى بيعرف يغنى طلع معانا وعرفنا على صوته الجميل ..

فى نهاية حفلتنا رسمنا على وشوش الأطفال بالألوان وفرحناهم بس أهم من كدة إننا علمناهم يعيشوا سنهم ويعيشوا برائتهم بعيد عن المجتمع اللى غير ملامح وبراءة الطفولة ..
ياريت اللى يقدر يفرح طفل ميتأخرش .. ياريت اللى يقدر يساعد طفل ميتأخرش
ياريت نلحق أطفالنا قبل ما المجتمع يغيرهم ونرجع نقول فين أيام زمان ..
عيش سنك عيش حلمك مبادرة هنحاول فيها نرجع الحلم للأطفال والفرحة والإبتسامة والأمل
هنحاول نرسم مستقبل جديد لهم  .. هنحاول نغير واقع مؤلم عايشين فية حتى لو لساعات بسيطة هية ساعات العمل فى المكتبة ..
أطفالنا ثروة لازم ننميها ..